Karjalan kielen tutkimizes on lunnastettu korgei palkindo
Karjalan kielen tutkii, Kielen, literatuuran da histourien instituutan piälikkö Irina Novak on suannuh Kanzalližuksien azieloin federuallizen agenstvan Kl’učevoje slovo -palkindon omassah tutkimukses ”Karel’skii jazikovoi landšaft v dialektometričeskoi paradigme”. Se on tiedonaizen monogruafii, kudai on kirjutettu hänen kielidouktoran dissertatsien perustehel. Kielen, literatuuran da histourien instituuttu joga vuottu yhtyy Kl’učevoje slovo -kilbah.
— Kilvas on eri nominatsiedu, sendäh meil on mahto yhtyö kilbah joga vuottu. Endizinny vuozin myö työnimmö kilbah instituutan jullattuloi tiedokirjoi, meijän tiedomiehien digitualuprojektoi. Vuvvennu 2017 tämän palkindon vepsän kielikorpusan luajindas on suannuh Nina Zaitseva, kerdoi Oma Mediale Irina Novak.
Irina Novakan tutkimus ”Karel’skii jazikovoi landšaft v dialektometričeskoi paradigme” on voittanuh Paras tiedoalan projektu -nominatsies. Omassah tiedoruavos Irina Novak kirjutti karjalan kielen murdehis da alamurdehis verdaillen niidy keskenäh da toizih baltiekkumeren-suomelazih kielih. Tutkimuksen vuoh suau parembi ellendiä karjalan kielen histourien. Tutkimuksen sähköversii suau lugie Kielen, literatuuran da histourien instituutan saital.
Vuvvennu 2025 kilbah oli työtty 250 zajavkua Ven’an 55 subjektas. Palkičuspido piettih Moskovas 11. talvikuudu Kielelline poliitiekku Ven’an Federatsies -fouruman aigah.
Aihies voit lugie suomeksegi.
Yhty Oman Median kanualah Telegramas!
