Karjala: 102 vuotta tašavalta muuttuu parempah päin
Karjalan tašavallan päivän juhlimini alko Ikusen tulen muistomerkin luo kukkien laškomisen seremonijalla šekä Karjalan puoluššukšešta kuatunuijen muissolla omissetulla hil’l’asuon hetkellä.
Venäjän, Karjalan ta Petroskoin viranomaset šekä anšijoitunuot ta kunnivoitetut eläjät tultih seremonijah ta pantih kukkie Tuntematon šotilahan hauvalla.
— Tänäpiänä tätä pruasniekkua juhlitah Karjalašta šyntysin olijat ta tašavallašša eläjät ihmiset, meijän muanmiehet ta vierahat, kaikki, kenen šyväimen palani jäi meijän šeuvulla. Meijän tašavallašša on äijän luonnon ta kulttuurin uartehie, ka kallehimpana on ahkera ta ruataja Karjalan rahvaš. Muissellen istorijua ta yhistyän omie voimie myö voimma muuttua Karjalua vielä paremmakši tulijie šukupolvie varoin, korošti Karjalan tašavallan piämieš Artur Parfenčikov.
— Vielä yksi vaihe on männyn ohi ta voimma nähä meijän ruavon tulokšie kaikilla aloilla. Varmašti ei niin ruttoh kuin himottais, ka myö niämmä niitä tulokšie ta panemma merkillä, jotta vuuvvešta vuoteh jättyä niitä huomuamatta on vaikiempi kuin Karjalan eläjillä, niin ni lukusilla vierahilla, lisäsi Valtijon Duuman kanšanetuštaja Valentina Pivnenko.
Karjala hyvin eruou toisista alovehista. Tašavalta šäilyttäy omua ainutluatuisutta ta kehittyy kaikilta puolilta.
Perintehen mukah Karjalan tašavallan päivän piätapahtumie vietetäh eri piirilöissä. Tänä vuotena juhla pietäh Onegarannan piirissä elokuun 27. päivänä.
