Karjalan tašavallan päivyä juhlittih Kalevalašša. Merkkivuuvven toimenpivot alettih piätinččänä. Kulttuuritalošša Kalevalan kanšanteatteri esitti uuvven Kajahuta laulu, karjalaini -spektaklin. Še oli valmissettu juuri Tašavallan päivyä varoin ta teatterilla oli šuuri kunnivo alottua juhlapäivät.
Pruasniekka jatku šuovattana. Huomenekšella kunnivoitettih Kalevalan muan Isänmuallisen šovan aikana kuatunuita šotilahie ta pantih kukkie vellešhauvalla. Ceremonijah otti ošua Karjalan piämieš Artur Parfenčikov, Valtijollisen duuman deputatti Valentina Pivnenko ta toiset korkiet vierahat.
Päivällä juhlaohjelma jatku kulttuuritalošša, missä Kalevalan piirin laulu- , tanšši- ta musiikkiryhmät annettih konsertti. Pruasniekašša oli niise pos’olkan vierahien onnitteluja.
– Arvosat piirin eläjät, hyvät muanmiehet ta pruasniekan vierahat. Miula on mukavua tervehtie teitä vanhalla, kaunehella mualla. Teilä on ainutluatuni luonto, tiälä eläy viisahie, nerokkahie, ruatajie ihmisie. Tällä mualla on ilmeštyn kanšallini eepossa. Tämä on mahtavan istorijan, mainijojen kanšallisien perintehien ta šuurien mahollisukšien mua, onnitteli karjalan kielellä kalevalalaisie Artur Parfenčikov.
Parahie esitykšie näytettih Kalevalan kuoro, Lokka-tanšširyhmä, kantelehella šoittajien ansambli, Jyškyjärven Tuomi-ryhmä. Luovan lahjan valmisti niise piirin piämieš Valentina Bulavtseva, kumpani laulo kaunehen laulun kotimuašta.
Koronarajotukšien takie ei pietty šuurta pruasniekkua. Šiäššettyö rahua käytetäh Kalevalan kehittämiseh ta kunnoštamiseh.