Karhumägeh nostetah uuzi vizit-keskus
Karhumäin linnah Lahti-laitos nostau kul’tuurutiedokeskustu, kudai rodieu tärgei Karhumäin piirin da kogo Karjalan turizman da kul’tuurualan kehittämizekse. Tiä tazavallan eläjät da Karjalah tulluoh voijah tuttavuo pohjaisrannan histourieh, suaja tieduo erilazih turistukohtih nähte, sego kävvä alallizih da aigoinvälizih ozutteluloih da yhtyö ruadopajoih.
Projektah pannah 23 miljounua rubl’ua. Keskukses rodieu 12 ruadokohtua. Vizit-keskuksen rakendus on jo nostettu, nygöi ajatellah keskuksen syväindyö.
— Mietimmö ozuttelutiloin ulgonägyö da perilöin planirovkua. Se andau mahton valmistua ainavoluaduine ozutuskohtu, kudai luadiu keskuksen mielužakse turistoih da tazavallan eläjih niškoi, sanoi Lahti-laitoksen ruadai Roman Šallojev Karjalan piämiehen lehtistöpalvelule.
Vizit-keskuksen projektu on Karjalan kehityksen korporatsien silmän al. Se autoi suaja luba rakendamizeh, hyväksyi tehnillizet ehtot da yhtes Karjalan enokoumizen kehityksen ministerstvan kel auttoi investorale suaja muatila ilmai torguloi.
Aihies voit lugie suomeksegi.
Yhty Oman Median kanualah Telegramas!
