”Kalevala” vepsän kelel täuti Karjalan avtoroiden elektroništ kirjištod.
“Kalevala” vepsän kelel läksi männudel vodel ”Kelʼt ei jüged kandišta! projektan aigan ”Periodika”-paindištos. Kändi kirjan vepsäks tetab Karjalas tedomez’, vepsän kelen tundii da oppii Nina Zaiceva. Nügüd’ ”Kalevala” vepsän kelel täuti Karjalan avtoroiden elektroništ kirjištod.
— Vodelpäi 2015 meiden elektronižes kirjištos paindas kirjoid, miččid lähteba eloho Karjalan Rahvahaližen da regionaližen politikan raha-abul. Sen taguiči siloi sünduiba kirjištos mugoižed kategorijad kut ”Rahvahaline literatur”, ”Tedoline proza”. Mö lujas tahtoim, miše ”Kalevala” vepsän kelel mugažo oliži pandud meiden elektronižehe kirjištoho. Ihastusiš tedištim, miše Vepsän kul’tursebr om necen painusen oiktusiden omištai, sikš ku nece sebr kaiken tahtol hökkähtub painda ičeze kirjutesid vepsän kelel internetas, sanub Karjalan Rahvahaližen kirjišton tedotehnologijoiden erišton varapämez’ Galina Galaničeva.
Vepsänkeližen kändmižen rindal om tekst venän-ki kelel (kändajad A.I. Mišin da E.S.Kiuru). Lugeda ”Kalevalad” vepsän kelel elektronižes formatas voib tägä.