On hyväkšytty piätöš uuvven päiväkojin rakentamisešta Kalevalašša. 500 miljonie rupl’ua annettih federalisešta b’utžetista arkttisen alovehen komiisin miäräykšellä.
Uuši päiväkoti voipi ottua vaštah 300 lašta. Šuunnitelmissa on niise järještyä šamašša rakennukšešša opaššušhuonehie 1. ta 2. luokilla. Šilloin paikallisešša koulušša vapauvutah tilat, jotta kaikki opaštujat voitais opaštuo enšimmäiseššä vuorošša.
‒ Nyt Kalevalan päiväkotiloissa on yhteh lašettuna 200 kašvattie. Kaikki rakennukšet ollah oikein vanhoja ta niitä aina pitäy korjata, šano Kalevalan piirin piämieš Valentina Bulavtseva.
Piirin hallinto uškou, jotta uuvven päiväkojin rakentamini tulou potkukši pos’olkan kehittämiseh.
‒ Pos’olkan eläjät oikein vuotetah päiväkojin uutta rakennušta. Lapšien vanhemmat tahotah, jotta kašvatiloilla olis luajittu paremmat olot. Niise sosialisen infrastruktuurin kehityš tuou toivoja pos’olkan kehittämiseh, lisäsi Valentina Bulavtseva.
Nyt valmissetah uuvven päiväkojin projektie. Piätöš uuvven päiväkojin rakentamisešta oli hyväkšytty Kalevalašša Karjalan tašavallan päivän juhlimisen aikana vuotena 2021. Karjalan piämieš lupasi kalevalalaisilla toteuttua tämän piätökšen.