Käzikirjutuksien kilbu: Ehti kirjuttua sygyzyssäh
Vuvvennu 2021 syvyskuus Kanzallizen da alovehellizen poliitiekan ministerstvu rubieu ottamah vastah kilbah käzikirjutuksii karjalan, vepsän da suomen kielel. Parahat käzikirjutukset piästetäh ilmah Karjalan Tazavallan b’udžietan varoih.
Kilvas rodieu viizi nominatsiedu: kirjutus lapsih da nuorih niškoi; kirjutus, kuduas roih ezitetty Karjalan Tazavallan kandurahvahien histouriellis-kul’tuurine perindö; kurjutus, kudai on suundavuttu Karjalan Tazavallan kanzoin da etniellizien joukkoloin etnokul’tuurizekse kehittymizekse, kuduas roih kerrottu nämmien rahvahien kul’tuuras da perindölöis, Tazavallan sotsiualu-ekonoumiellizeh da kul’tuurizeh kehittämizeh panokses; kirjutus, kudai opastas nuorii moralih da harjaittas suvaimah omua mudu; tiijollis-metoudielline literatuuru.
Kilbah voibi yhtyö yksitellen libo joukolleh. Kilbuniekal pidäy olla vahnembi 18 vuottu, pidäy olla Ven’an Federtsien kanzalazennu da Karjalan eläjänny.
Käzikirjutus pidäy työndiä kilbah kohendetunnu, vältämättäh pidäy olla merkitty nominatsii.
– Kilvan panemmo rattahile lähembä sygyzyy, sih nähte ilmoitammo erikseh, sanou Kanzallizen da alovehellizen poliitiekan ministerstvan ruadai, kilvas vastuaju Svetlana Kostina.
Ližiä tieduo kilbah nähte voibi suaja Kanzallizen da alovehellizen poliitiekan ministerstvas adresil Petroskoi, F. Engel’san piha, 4, perti 42, telefonas (8142) 78-43-56 libo sähköpoštan kauti (Svetlana Gennadjevna Kostina).
