Hyviä ruaduo ičeväil
Vieljärven kyläs ”Karjalan kielen kois” 23. kevätkuudu pietäh hyvyönluadijoin kruugu. Kilbailemah ruvetah kolme projektua.
Kolatsellän kul’tuurutaloin projektan mugah tahtotah uvvistua sen ulgoseinät. Heččulan kylän aktivistoin kehoitettu ”Poleznii škaf” rubieu ottamah vastah käytettyy bumuagua, batareikoi da tostu semmostu, midä voibi käyttiä äijäh kerdah. Paiči sidä kyläläzet suajäh tuvva sinne sidä, midä heile jo pie, ga toizil net vie pätäh aiga hyvin. Vieljärveläzien Avua veräi kirjoin muailmah -projektan mugah tahtotah panna kundoh kylän kirjaston uksičuppu da luadie bukkrossing-kohtu, kuduah kyläläzet ruvetah tuomah omua kirjua da ottamah sie olijua da toizien tuoduu.
— Tämä roihes jo 23 hyvyönluadijoin kruugu. Ylbeilen kylien aktivistoi. Vieljärveläzil jo on valmis makiettu, mittuine čoma heil rodieu veräi da sen rinnal olii seiny. Pieni kodaine, kuduah jogahine vieljärveläine suau tuvva kirjua da ottua sie olijua, sežo rodieu aiga pättävy kyläs. Kolatsellän akat, kuduat pellastettih oman kylän kul’tuurutaloin, vaihtettih sie ikkunat da nygöi telmetäh sie, valmistetah kaikenmoizii pidoloi. Heččuil’čat, kuduat joga vuottu kunnostetah omua kyliä, sanoi Oma Mediale Jekaterina Jefremova, Melnitsa-fondan piälikkö.
Hyvyönluadijoin kruugu pietäh Alovehelline aljansu -projektan hantuzis Prezidentan grantufondan kannatuksel.
