Murmanskas mäni Rahvazkeskeine forum, mitte ühtenzoiti igähižid rahvahid, biznesan da valdmehišton ezitajid. Forumaha ühtniba Karjalan igähižiden rahvahaiden ezitajad-ki.
Erazvuiččiš Venäman čogaižiš äjil igähižil rahvahil kalatuz, mectuz, pedroidenpidätuz, marjoiden da babukoiden keradamine zaimiba tärktan sijan heiden elos tämbei-ki. Tegeližil predprijatijoil, miččed radaba igähižiden rahvahiden tradicionaližiš elontahoiš, mugažo om sur’ znamoičen meiden man ekonomikan kehitoituses. Sikš pidab tehta hüvid kosketusid igähižiden rahvahiden, biznesan da valdmehišton keskes.
Karjalan valdkundas om hüvä ozutez satusekahas ühthižtös kivisaskelmižiden predprijatijoiden da Kalagen külän administracijan keskes.
— Karjalan valdmehišton, Londuzvaroiden da ekologijan i Rahvahaližen da regionaližen politikan ministerstvoiden abul om allekirjutadud kožmuz socialiž-ekonomižes ühthižtös predprijatijoiden da Vepsläižen Kalagen külän administracijan keskes. Nece om ezmäine hašk külän kehitoitandaha, oiktaha manvaroiden kävutoitandaha i se abutab pätta ekoligišt problemad vepsläižiden elontahos, sanub Vepsän kul’tursebran ühtnik Natalja Silakova.
Necen ühthižtön satuseks vodespäi 2018 Kalages udištadihe kaks’ memorialad, tehtihe sportzal kul’turpertiš, lapsiden vändsijad, jämäčtandreh i minijaugpöud, radaba ”Värtin”-etnokeskuz i ”Kalarand”-etnopark, om kohetud küläted i m.e.
— Miše ladida nenid kosketusid, pidab arvostelda kut predprijatijad painastaba igähižihe eläjihe. Neciš abutab etnologine ekspertiz. Hüvä mahtišt om Jakutial, kus om tehtud kožmusid, erazvuiččid programmoid da projektoid, miččed tugeba igähižid rahvahid, ližazi Vepsän kul’tursebran pämez’ Larisa Čirkova.