Karjalan valdkundas elokun 9. päiväl praznuitas Rahvazkeskeine mirun igähižiden rahvahiden päiv. Joga voden necil päiväl karjalaine karg ”Kruuga” ühtenzoitab rahvahid, kudambad eläba meiden valdkundas.
Necil vodel jügedoiden epidemiologižiden oloiden taguiči praznik pidetas online-formatas. Rahvahaližen da regionaližen politikan ministerstv kanman praznikad taričeb ühteta ”Sädoiden kruuga”-flešmobha.
— Flešmobha voiba ühteta kut aigvoččed, muga lapsed-ki. Necen täht pidab tehta fotokuva Karjalan igähižiden rahvahiden sädoiš – nece voib olda vepsläižiden, karjalaižiden, suomalaižiden, pomoroiden vai toižen rahvahan kost’um, i panda se ičeze lehtpolel socialižehe verkoho hešteganke #КруугаКостюмов. Mugažo pidab starinoita ičeze kost’uman polhe, sanub Rahvahaližen da regionaližen politikan ministerstvan radnik Aleksandra Anufrijeva.
Flešmob jatkub elokun 1. päivähasai. Vägestajid valitas änistamižel Vkontakte-lehtpolel 2.-5. päivil elokud.