”Kalevalan mail’m” – mugoine nimi oli anttud vepsänkeližele ekskursijale. Idejan tehta sen andoi ”Vepsän vezad”-sebran pämez’ Tatjana Martjanova. Ekskursijan om vedänu Karjalan Taidehmuzejan radnik Julia Aprodu. Mugoine azj oli tehtud ezmäižen kerdan muzejan istorijas.
— Vepsän kel’he ”Kalevalad” kändi minun opendai, lujas hüvä naine, tedomez’ Nina Zaiceva. Nece kirj minei lujas abuti rados, ekskursijan vaumičendas, sanui Julia Aprodu.
Ekskursijal starinoitihe Karjalan da Venäman taidehpirdajiden kuviden polhe, miččiš om ezitadud Kalevala-eposan s’užetad da eposan pämehed. Kuviden keskes oma Tamara Jufan, Osmo Borodkinan, Müd Mečevan, Georgii Stronkan da toižiden tetabiden pirdajiden kuvad.
— Minä meletan, miše mugoižid azjtegoid pidab tehta enamba. ”Kalevala”-epos ühtenzoitab suomalaiž-ugrilaižid rahvahid. Nece ekskursii vepsän kelel andab voimusen meile, vepsläižile keratas ühthe, mänetada aigad ühtes, pagišta ičemoi kelel, se abutab kehitoitta kel’t, sanui ekskursijale tulnu adiv Sv’atoslav Polin.