Opaštuo livvin ta vienankarjalua šuau makšutta Karjalan rahvahan liiton pitämilla kurššilla. Petorskoissa kerran netälissä kanšantaijon keškukšešša ruvetah opaštamah kirjuttamah, lukomah ta pakajamah karjalakši. Opaššušvuuvven juhlallini alku piettih Karjalan kanšan yštävyön kojissa. Šiinä opaštujat tuttavuššuttih opaštajih: Anastasija Junginah ta Valerija Grafovah šekä kanšalaisjärješšön toimintah.
— On tärkie šäilyttyä yhteyttä omah kanšah ta opaštuo muamonkieltä. Karjalašša šemmosie mahollisukšie lisäytyy. Niise kučun teitä liittymäh kanšalaisjärješšön toimintah, kekšie projektija ta toteuttua niitä, šano avajaisissa Karjalan kanšallisen ta alovehellisen politiikan ministerijön kantakanšojen kannattamisen ošašton piällikkö Jelena Migunova.
— Tämä opaššušvuosi on enšimmäini miula. Iče olen vielä ylioppilaš ta ušon jotta meijän oppituntija vietämmä mukavašti ta työ opaššutta karjalan kieltä helpošti, šano livvin opaštaja Valerija Grafova.
Avajaisissa esiinty Čičiliušku -kanšanteatteri. Še näytti patkän Kalevala-esitykšeštä šekä Kajahuš-ryhmä laulo kolme runuo karjalan kielen eri murtehilla.