Abilimpiks: kaheksa meigälästy suureh pidoh
Karjalan kaheksa eläjiä ruvetah edustamah tazavaldua kanzallizen Abilimpiks-čempionuatan valličusvaihies. Pidoloi valmistetah federuallizen Professionalitet-projektan hantuzis kanzallizen Nuorižo da lapset -projektan mugah.
Kilvan valličusvaihe pietäh muan 15 alovehel 47 ruadoneron alal, sih yhtyy enämbi 2 tuhattu hengie kogo Ven’alpäi. Valličusvaihies voittanuot, kudamien nimet ilmoitetah heinykuus, yhtytäh kilvan finualah.
— Karjalaspäi rubieu kilbailemah 8 hengie – alovehellizen kilvan školaniekat-, yliopastujat- da ammattimiehet -nominatsielois voittanuot da palkitut. Kilbua pietäh 19. oraskuudu — 2. kezäkuudu Moskovan alovehen, Voulogdan da Piiterin opastuslaitoksis. Karjalan edustajat ruvetah ozuttamah omua neruo kuvves ammatis: žestitaido, vokalinero, magieloin pastoksien malto, syömizien keitändy, hierondunero da kabrastamine, ilmoittau Karjalan piämiehen lehtistöpalvelu.
Ven’an suurimii liikkehii olii Abilimpiks-liikeh kannattau niilöi, kel on vaigevuksii tervehyön puoles, auttau kehittiä ruadoneroloi da maltoloi. Ven’an opastuksen ministerstvan tiedoloin mugah Abilimpiks-liikkeheh kuulujis nuoris 93% löytäh ruadokohtu.
Yhty Oman Median kanualah MAX:as!
