Tehtud käzil bobaižel om ičeze heng

Kaks’ vot tagaze Muzejan ö-praznikal L’ubov’ Ivanova vedi mastar’-klassan lapsiden täht, se tuli mel’he tulnuzile i siš aigaspäi mugoižed urokad lapsiden täht om kaikenaigaine azj. Kuva: Šoutjärven vepsän etnografižen muzejan arhivaspäi

Kaikid suremb vepsläine muzei, mitte sijadase Šoutjärves, ei ole vaiše tradicionaline muzei, se om tehnus äjiden ristituiden armhaks sijaks, kus vedetas melentartuižid vastusid, kus voib lebaitas, pagišta jodes čajud da kuna lapsed rigehtiba školan jäl’ges.

Muzejan radnikad tegeba äjan sen täht, miše adivoil oliži taht tulda tänna. Üks’ mugoižiš radnikoišpäi om L’ubov’ Ivanova, kudamban polhe vepsläižed sanuba: ”Hänen käzišpäi kaik lähteb”. L’ubov’ tegeb čomad tehmused erazvuiččiš materialoišpäi, kudob, pletib tohespäi. No enamba kaikid hän navedib tehta bobaižid. 

Mö tedam, miše ezmäine mučak oli kut znam, simvol, kaičii. I vaiše kut mäni aig, nügüd’ se om bobaine

L’ubov’ Ivanova, Šoutjävren muzejan radnik

Niid hän navedib laps’aigaspäi. Konz oli neičukaižen, lujas navedi väta tätüižil vai kut sanuba šoutarvelaižed, ”mučakiihe”. Hänen sanoiden mödhe tehtud ičeze käzil mučakol om ičeze heng, i se linneb mugoižen, miččed meled sen tegii paneb sihe.  

– Mö tedam, miše ezmäine mučak oli kut znam, simvol, kaičii. I vaiše kut mäni aig, nügüd’ se om bobaine”, sanub L’ubov’ Ivanova.

Armastuz bobaižihe om tehnus elon azjaks da radoks. L’ubov openzihe ombelta tätüižid iče. Radmaha käzil hän opendase nügüd’-ki. Ičeze tehmusiden täht hän otab erazvuiččed materialad, muga sünduba čomad azjad, miččed paksus tegesoiš hüvikš lahjoikš ičhižile.  

– Minei oli mel’t möto tedištada midä-se ut i minä äi kerdoid olin Petroskoiš i openzimoi rata käzil. Minä olin äjil mastar’-klassoil, ozutesikš, openzimoi, kut pletta tohespäi, ombelta bobaižid, kut tehta čomad änikod foamiranaspäi i kangaspäi, kut tehta bobaižid villaspäi, jatktab L’ubov’ Anatoljevna.

Pehmdad bobaižed, kuzen čomitesed, mujukahad sijakatused kanghan palaižišpäi... I nece ei ole kaik. Hänen radod voib kacta muzejas, tägä-žo voib opetas tehta niid ičeze käzil. L’ubov navedib jagadas ičeze mahtoil. Kaks’ vot tagaze Muzejan ö-praznikal hän vedi mastar’-klassan lapsiden täht, se tuli mel’he tulnuzile i siš aigaspäi mugoižed urokad lapsiden täht om kaikenaigaine azj.

– Mö tedam, miše nügüd’ lapsed äi aigad oma školas, pä heil väzub, i tahtoim, miše konz hö tuldaze muzejaha, hö midä-se tedištaze da völ lebaidaze, sanub L’ubov’ Ivanova. Muga Šoutjärven muzejas tehtihe čogaine lapsiden täht. Tänna tuleskeleba vanhembad-ki i spasiboičeba muzejan radnikoid heiden hüväs da tarabhaižes rados.