Kahen vuuvven väliajan jälkeh Kruuga-yhtyvehen artistat käytih esityšmatalla Udmurtijan tašavallanpiäkaupunkih Iževskih. Tämän vuuvven kevätkuušša šielä piettih Šilta – perintehien läpikulku -kanšainvälistä festivalie šamannimisen projektin rajoissa. Šen tavoittehena on ratkaissa šuomelais-ugrilaisien kanšojen kulttuurin šäilyttämisen proplemoja tanššin kautti. Toimenpitoja projektin rajoissa pietäh jo 16 vuotta. Tänä vuotena projekti voitti Presidentin fondin granttien kilpailun. Johtajana on Udmurtijan anšijoitunut kulttuuriruataja Natalja Čirkova.
– Jo kolmaš kollektiivien šukupolvi tänä vuotena liitty Kruuga- ta Čebeläi -tanšširyhmien väliseh yhteisruatoh. Meijän yštävyš alko 10 vuotta takaperin. Meilä on šamoja tehtävie – kehittyä kanšallista kulttuurie, käyttyä nykyaikasie keinoja kantakanšojen folklorin elvyttämiseh. Yhtehiset projektit on hyvä mahollisuš jakua kokemušta, kerto Kruuga-kollektiivin ohjuaja Svetlana Gretskaja.
Festivalin rajoissa niise pietäh seminarija ta muasteri-oppija, kumpasih kučutah spesialistija ulkomailta ta Venäjän erilaisista šuomelais-ugrilaisista tašavalloista, niijen luvušša Karjalaštaki.
Iževskissa projektin rajoissa oli pietty Čebeläi-tanšširyhmän vuotisjuhlakonsertti. Še tuli šuurekši pruasniekakši ainutluatusen folklorin arvoštajilla. Videoinstal’l’atijo autto yhistyä esitykšen erityylisie ošie, luonnon ta kaupunkin teemoja. Esityš kerto nykyaikasen miehen yhteyveštä luontoh ta juuriloih. Še šelittäy šitä, mintäh nykyaikani nuoriso kiinnoštuu folklorih ta tahtou käyvä perintehellistä musiikkie ta kanšanrunoutta šäilyttäjih ryhmih.
– Kruuga-yhtyveh anto festivalissa nellä konserttie. Ne oltih enšimmäisinä pitän paussin jälkeh, konša ei ollun konserttija eikä harjotteluja. Rauhottomušta oli kaikilla: vanhemmilla, opaštajilla ta kaikešta enemmän lapšilla. Ennein konserttija hyö ahkerašti harjoteltih. Kun konsertti alko tuli šelvä, jotta kaikki huolet oltih turhah – meijän karjalaiset tanššit, kumpaset oli esitetty šuurella lavalla, oltih šuuren konsertin kirkkahana tapahtumana, korošti Kruuga-yhtyvehen opaštaja Kirill Gurejev.
Kaikki festivalih ošallistunuot lapšet ta opaštajat šuatih hyvyä tunnelmua. Hyö šäilytetäh eri kanšojen kulttuurie ta henkellisešti hyö ollah lähisie – lapšet folkloriryhmissä opaššutah ymmärtämäh ta šäilyttämäh kantatuattojen viisahutta. Heilä tanšši on šiltana muinasešta kulttuurista nykymuajilmah.