Ojatʼ-jogen molembil randoil seižub Šondjal-külä. Nece om keskvepsläižiden ma Piterin agjan Podporožjen rajonas. Šondjalan kesktaho nimitadas Sohromaks, mugažo om ülembaine pala – Mägi da alembaine Org.
Ojatin toižele randale voib putta mändes pušt sildadme vai ajada traktoral ani jogen päliči. Nügüdʼ deröunas om kaksʼ pušt sildad: üksʼ om uzʼ bibusild, a toine om alembaine, puižil jaugoil seižui sildaine
Sovetskijan aigan Šondjalan eläjad radoiba enamban sovhozas. Küläs oli ferm, kus pidetihe lehmid. Šondjeižed lapsed openzihe Järviden-külän školas. Šondjalaspäi Järvihessai om nelʼlʼ virstad. Nece om surʼ da lähembaine külä.
Šondjalas oli koume časounʼad. Orgos, ei edahan küläspäi om Pokrovan časounʼ. Männudel vodel tägä vanhan pertižen sijale oli letud uzʼ časounʼan sauvoduz. Mägel, koivuiden keskes seižub časounʼ, kuna keradase rahvaz Pedron päiväle, mitte om Šondjalan päpühä. Koumanzʼ časounʼ seižui vanhal mänijal Mäggärʼ-külähä tel. Nügüdʼ necen časounʼan sijale jäi vaiše zavetan kivi, kuna tuleskeleb ristituid.
Šondjal om vanh, penʼ vepsläine külä. Meiden päivil sigä eläb läz kaksʼkümned mestʼ. Kut toižiš-ki küliš kezal eläjid tegese enamba.
Nelʼlʼ vot tagaze Šondjalas mäniba suren vändfilʼman sjomkad. Filʼman nimi om ”Žili-bili”. Sjomkoiden täht tarbiž oli čoma todesine külä. I Šondjalan randad da pertid tuliba melʼhe kinon tegijoile. Kaiken kezan küläs eli da radoi äi mehid. Nece oli melentartuine azj külän eläjiden täht da äjile jäi muštho.