Mie olen muššalla listalla -spektakli pohjautuu nykyaikasen dramakirjuttajan Igor’ Vitrenkon Mie tanššin kuin debiili -näytelmäh.
Ohjuajana on Venäjän teatteritaijon akatemijan opaštuja Murat Abulkatinov. Vuotena 2013 hiän lopetti Saratovin valtijonkonservatorijan teatteritietokunnan. Murat Abulkatinov näytteli Saratovin Teremok-kuklateattetissa ta Moskovan kuklateatterissa. Hänen ohjuamien spektaklien luvušša on “Muamoštani ta miušta”, “Tuhkimo”, “Finist – hyvä haukka”, “L’impression. Tarha”.
– Igor’ Vitrenkon näytelmän piähenkilö on 39-vuotini eronnut mieš Tol’a Tolstov. Hänellä on 15-vuotini poika. Tol’a eruou tyttöyštäväštäh ta rakaštuu 22-vuotiseh työkaverih. Lukija šuau tietyä, jotta lapšuošša Tol’alla ennuššettih elämän rakkahutta, kumpani on juuri 17 vuotta nuorempi kuin hiän. Poika mieltyy šamah 22-vuotiseh tyttöh, mi šytyttäy ristiriitua. Pojan ta tuaton kilpailu pahentuu, konša Tol’ašta tulou sosialiverkkojen tähti šytyttäjien tanššien jälkeh. Lopušša kuitenki tulou šelväkši, jotta ennuššukšen mukah Tol’an mielitietty naini on kymmenen vuotta nuorempi häntä. Niin piähenkilö šopiu entisen tyttöyštävän ta oman pojan kera. Ka spektaklin juoni on muokattu, kertou Murat Abulkatinov.
Ohjuajan mukah, Igor’ Vitrenkon näytelmäššä Tol’a Tolstovin ta 22-vuotisen tytön väliset šuhtehet ollah ičekšeh toivottomat. Ka Murat Abulkatinovilla kyšymyš on oikeista tuntehista, kumpasista piähenkilö kieltäytyy, šentäh kun hänen valintah vaikuttau yhteiskunta.
– Piähenkilö šanou “Mie olen Jumalan muššalla listalla”. Näin hiän kieltäytyy vaštuamašta omašta elämäštä. Miula hiän on muurnin kiännetty antikkahenkilö. Kreikkalaisen tragedijan henkilöt näytetäh rohkeutta, hyö ei alissuta jumalih, šilloin kun Igor’ Vitrenkon henkilö on ihan vaštah panomatoin, šelittäy ohjuaja.
Enšimmäiset harjotukšet alettih šyyškuušša. Spektaklin valmisti nuori konštikaš joukko. Lavaštajana on Sofja Šnir’ova, horeograffina on Nikita Bel’akov, apuohjuajana on Jelizaveta Ignatenkova ta valošuunnittelijana on Pavel Babin.
Sofja Šnir’ova muutti spektaklin tilua valodioditanššilavakši, kumpani tarkottau loputointa illaččuo, kumpaseh ošallistuu piähenkilö.
Speklaklissa esiinnytäh P’otr Kasatjev, Gleb Germanov, L’udmila Isakova, Andrei Gorškov, Nastasja Šum, Ksenija Šir’akina, Lada Karpova, Alina Grišakova.
Projekti on toteutettu käyttyän Venäjän kulttuurišiätijön granttie.