L’udmila Mehed: "Karjalan uardehennu ollah rahvas"
L’udmila Mehedanke myö vastavuimmo pädeväs kohtas – kirjastos. Čalnan kirjastos L’udmilua hyvin tutah, naine kävyy sinne joga pidoh. L’udmila hedi sanoi, ku ei suvaiče paista omas ičes, ga omas mieliruavos pagizou rakkahal.
L’udmila Mehed tartui kirjuttimeh eläkkehele lähtiettyy seiččie vuottu tagaperin. Ammattii myö naine on kondiitteru. Omii enzimäzii tevoksii naine kirjutti nuorete. Nygöi L’udmilan runoloi da kerdomuksii piästetäh ilmoih Ven’an da Karjalan julgavolois, sanommo, Komin tazavallan Siktivkar-al’manuahas, Mujehjärven da Priäžän piirin lehtis da valgoven’alazes Suarnu yöle - žurnualas lapsih niškoi. L’udmila kirjuttau ven’an kielel, ga hänen erähii tevoksii kiännetäh da painetah Kipinä-žurnualah da Oma Mua -lehteh.
– Minä en ole ammatilline kirjuttai, engo runoilii. Opastun täh dieloh iče ‒ luven kniigoi, yhtyn literatuurukluubah. Kirjuttamine avvuttau minule piästiä elaijan vaigevuksis, sanoi L’udmila Mehed.
Vuvvennu 2017 piäzi ilmoih L’udmila Mehedan Karjal, sinä olet ijäkse minun elokses -kniigu. Se painettih kirjuttajan varoih. Vuvvennu 2018 Suomes piäzi ilmoih Suarnastu lapsih näh -kniigu, kuduan karjalakse oli kiändänyh Natalja Gilojeva (Natalja kirjuttau “Omah Muah” nimel Hiloin Natoi – toim.). L’udmilan opastajii kerdomuksii lapsih niškoi puaksuh toiči avtoinspektsien saitale, saitalgi stihi.ru löydyy jo enämbi 400 L’udmilan runuo.
Jo kuvvettu vuottu L’udmila kuuluu Sonet-literatuurukluubah, kirjuttajat kerrytäh yhteh kerran kuus Karjalan kanzallizeh kirjastoh. Kluuban johtajannu on kirjuttai Oleg Gal’čenko. Oleg opastau algajii kirjuttajii oigieh kirjuttamah runoloi.
Kirjuttua L’udmilale avvuttaugi hänen seiččievuodine An’a-bunukku, lapsi nevvou tiemoi.
– An’a huomuau, ku kuudam on banuanan muodoine, päiväine on oranževoi, ku apel’siinu. Kerran talvel luajimmo An’anke lumiukkuo plastiliinas da keksimmö sit suarnan ekolougieh nähte. Parahite silloi Segežas lumi rodih keldazekse, sanoi L’udmila.
L’udmila kuuluugi Čalnan kirjaston literatuurupertih. Ei ammui kirjastoh niškoi naine valmisti videon, kus lugi oman suarnan.
L’udmila Mehed alalleh yhtyy da puaksuh voittau Priäžän piirin Aleksandr Bugmirinale omistettulois lugemizis. Naine yhtyy toizihgi kirjuttajien da runoloin kilboih, rahvas lämmäh otetah vastah L’udmilan tevoksii.
L’udmila sijaittau omii tevoksii omah Kareločka-sever’anka-Vk-sivu. Seiččie vuottu tagaperin naine rubei panemah sivule luonnon fotokuvii, kudamii häi luadiu oman ukonke kalas olles. Sit häi rubei painamah omale sivule runoloi da kerdomuksii, kirjuttamah Čalnan kylän elaijas da kuulumizis.
– Tänävuon kylmykuun allus Čalnas rodih tulipalo. Minä “löin hädäkelluo” omal Vk-sivul da kyzyin abuu hädäh puuttunuzih niškoi. Rahvas annettih vieššilöi da sobii. Erähäle školaniekale kerättylöih den’goih ostettih kannettavu tiedokoneh. Kerran sivun kauti kerättih den’gua ruakkah vuomatunnuole brihačule. Kyläs eletäh hyvätahtozet rahvas, hyö avvutetah kodittomile žiivatoilegi, sanoi L’udmila Mehed.
Ližiä lugekkua Oman Muas 16. talvikuudu 2020.
