”Noriden vastuz Karjalan mal”-etnolager’ mäneb jo kudenden kerdan Petrsokoiš. Kaks’voččen keskustan jäl’ghe vanhembiden klassoiden openikad tuliba erazvuiččiš Karjalan da Tverin agjoišpäi tundištamhas Karjalan kelidenke da kul’turanke.
Ezmäine lagerin päiv zavodihe aigoiš homendesel openduzprogrammaspäi Petroskoin universitetas. Baltianmeren suomalaižiden keliden kafedran opendajad lugiba lapsile lekcijoid vepsläižiš da karjalaižiš da neniden rahvahiden keliden polhe.
— Programman openduzpalan pätegend om tundištoitta lapsid vepsän da karjalan kelidenke, kodvda heiden tedoid. Mö kaikuččen voden vaumičem midä-se ut, starinoičem openikoile meiden kafedran polhe, sanub baltianmeren suomalaižiden keliden kafedran opendai Anastasija Afanasjeva.
Etnolagerin rad jatkub kül’mkun 4. päivähasai. Sen programmas om openduz- da kul’turpala. Openduzpala mäneb Petroskoin universitetan seiniš.
Uzištoid neciš temas voib lugeda mugažo suomeks.