Vuokkiniemi: Uuvvet tietotaulut kerrotah kylän laitokšista
Kolmella uuvvella tiijotuštaululla kerrotah Uhtinskii-sovhosin Vuokkiniemen prikatista, meččälaitokšešta, Himleshosi-laitokšešta, ratijo- ta telefoniyhtevyšlaitokšešta ta niijen ruatajista. Ne toimittih Vuokkiniemeššä Šuuren Isänmuallisen šovan jälkeh.
— Tietotauluissa on valokuvie ta tietoja, šekä näijen laitokšien ruatajien muisselmie, mimmoset tehtävät heilä oltih, mitein ta mimmosissa oloissa hyö ruattih. Teksti on venäjän ta karjalan kielellä, šelitettih projektin toteuttajat.
Tiijotuštauluja luati Vuokkiniemen puušeppä Aleksandr Lesonen. Niijen ašettamisešša autettih Kylän Hätätilalaitokšen prikati ta Kala- ja marjapojat -yhtijön ruatajat.
Näyttely oli ašetettu Karjala: vetämispistehet -projektin rajoissa. Šamanmoisie tiijotuštauluja oli niise ašetettu Čuupašša ta Šuurešša Lahešša.
Projektin tehtävänä oli kuččuo paikallisie eläjie kotipaikkojen istorijan tutkimiseh, kekšie projekti paikallisien eläjien kera ta toteuttua še, šekä kertuo elinpaikkojen kehityšmahollisukšista. Projektie toteutetah Karjalan piämiehen granttien fondin rahotukšella.
