Uuvven felššeri-šynnytyšpunktin rakennuš rakennettih tervehyšhuoltoalan alkutašon kehityšohjelman mukah. Še on nykyaikani ta rakennettu niin, jotta pohjoisilmašton oloissa še olis lämmin ta mukava. Punktissa on šähkö, viemäri ta vejenhankinta. Niise uuvvešša rakennukšešša on uušie varuštehie, kumpaset annetah enemmän liäkintämahollisukšie.
‒ Nyt felššeri-šynnytyšpunktissa on tarvittavie varuštehie, jotta viettyä elvytyšpitoja, ginekologisie tarkaššukšie. Entiseššä rakennukšešša šitä ei šuanun luatie. Niise uuvvešša rakennukšešša on tila liäkkehien šäilyttämistä varoin ta kohta punktissa niitäki voipi šuaha, šelitti Vuokkiniemen felššeri Julija Poljakova.
Julija Vasiljevna eläy ta ruatau Vuokkiniemeššä vuuvvešta 2012. Tervehyšalalla felššeri ruatau 34 vuotta.
Piätöš uuvven felššeri-šynnytyšpunktin rakentamisešta oli hyväkšytty kakši vuotta takaperin, šen rakentamini alko viime vuuvven kevyällä. Vuokkiniemeššä koko vuuvven eläy noin 360 ihmistä, oraškuušta šajekuuh miärä kašvau 500:h, šentäh kun kyläššä on äijän vierahie, turistija, kešämökkiläisie.