Voimmo kaunistua Anuksen linnua yhtes
Nygöi jogahizel Anuksen lohkol eläjäl on mahto vallita se paikku, kudamua ruvetah kunnostamah.
Anuksen valličukses on n´elli paikkua: kävelijöin kujo Proletarskaja-uuličal, Brendojevan parku, kävelijöin dorogu Oktabrskaja-uuličal da mašinoin paikat.
– Minä yhtyn Anuksen kunnostettavien paikoin valličukseh sendäh, ku Anus on minun kodimua. Minun mieles kaikil pidäy iänestiä, yhtes myö voimmo čomendua meijän Anustu. On hyvä, ku voimmo iänestiä Internetan kauti, nygöi kaikil se on da myö voimmo nähtä, midä tapahtuu meijän linnas. Ristikanzu jo ei sano, ku hänel ei olluh aigua tulla iänestämäh, iäneständäh pidäy viizi minuuttua aigua, sanou meile Petroskoin universitietan opastui Anna Aleksejeva, kudai on roinnuhes Anukses.
– On hyvä, ku nygöi voimmo iče vallita paikan, kudamua ruvetah kunnostamah. Meijän linnu on ylen čoma da tahtozin, ku se olis vie čomembi. Iče en voi iänestiä Internetas, sengäh ku en malta käyttiä sidä. Minun vunukku avvuttau minule da sit minägi yhtyn täh valličukseh – sanou eläkkeheläine Svetlana Čuprova.
Iänestys ei ole jygei, voit iänestiä eri taval: Internetas, volont’uoran avul da omas kabinietas.
