Viktor Jeršovin ta Konstantin Loginovin kirja “Karjalan ta lähialovehien peitošša pietty kanšanrunouš” näki päivänvalkien Karjalašša. Šen esittely piettih Karjalan kanšallisešša kirjaštošša.
Kirjan luatijina ollah Viktor Petrovič Jeršov, pedagogisien tietojen kandidatti, opaštaja, kotišeutututkija ta kakši vuotta takaperin tuonilmoih šiirtyn istorijallisien tietojen kandidatti, kotišeutututkija Konstantin Loginov.
Kirjan esittely piettih Karjalan kanšallisešša kirjaštošša. Tapahtumah keräyty luatijien kollegoja, opaštujie, yštävie, kanšanrunouven ihailijie.
— Mie olen oikein iloni nähä teitä kirjan esittelyššä, tervehti Viktor Jeršov vierahie, kumpasie oli täysi sali, Konstantin Loginov oli ihmellisenä ihmisenä ta luati äijyä, jotta kirja näkis päivänvalkien, ka liian aikaseh loppun elämä katkasi šuunnitelmie. Mie olen kiitollini Irina Vinokurovalla, jotta hiän otti omih kasih kirjan tietehellista toimitušta ta nyt še on valmis.
Viktor Jeršov lisäsi, jotta voipi šanuo koko kotišeutututkimukšen ošašto ošallistu kirjan valmistamiseh. Šentäh kun kirjašša on julkaistu erilaisie taikašanoja, kumpaset oli kerätty opaštujien ta jatko-opaštujien, tietomiehien kollegojen avulla monien tutkimušmatkojen aikana.
Kirjan esittelyššä oli äijän kiitollisie šanoja ta kertomukšie, mitein kanšanrunoutta kerättih, mitä kirjan luatijat tutkittih, mimmosie täh teemah liittyjie tevokšie vielä on julkaistu.
Karjalan ta lähialovehien šalani kanšanrunouš -kirja on julkaistu Verso-kuštantamošša. Še voi oštua Karjalan tietokeškukšešša, istorijan, kirjallisuon ta kielen instituutissa.