Vienan henki šäilyy muuttumattomana
23. heinäkuuta Vuokkiniemen kylän eläjät, Viena-šeuran jäšenet, Koštamukšelaiset, Vienan Karjalan eläjät ta vierahat šuatih tulla kešäpruasniekkah Pirttilahen kylän Taipale-huutorilla.
Tällä kertua pruasniekan keškitapahtumana oli Pirttilahešta kertojan tietotaulun avuamini. Še oli luajittu Myö karjalaiset -projektin rajoissa. Venäjän kielellä tekstin valmisti ta karjalakši kiänti huutorin isäntä Leonid Gundirev.
— Tämä on kolmaš tietotaulu, kumpasen myö olemma ašettan tänä kešänä. Enšimmäini oli Koynäškošella, toini — Ponkkalahešša ta kolmaš — tiälä. Kaikilla niillä on šama tarkotuš — kertuo paikan istorijašta, šano projektin johtaja Julija Filippova.
Tietotaulun viereššä Taipalen isäntä kerto kylän istorijašta, omašta šuvušta ta Taipalehen nykyiseštä ta tulovaisuošta.
— Nyt myö perehen kera vietämmä tiälä kešyä. Kunnoššamma omua paikkua ta tahomma, jotta šiitä tulis taitopaikka, kunne ihmiset voitais tulla šuamah innoššušta, šelitti Leonid.
Pruasniekan ohjelmašša oli lauluja karjalakši ta šuomekši, Koštamukšešta tullut duetti: akkordenilla šoittaja Oleg Kaliničev ta laulaja Jalmar Paavilainen esitettih vilkkahie ta hitahie karjalaisien ta šuomelaisien šäveläjien šävelmie šekä kanšanlauluja ta Viena-šeuran vanhemman šukupolven jäšenet opaššettih nuorempie tanššimah. Niise oli järješšetty kaikeinmoiset muasteri-opit.
