Kyläs eläjäl rahvahal on tärgei dielo kerävyö yhteh. Suuri Vieljärven kylä Priäžän piiris on jiännyh ainavota pajojoukota. Mulloi keskusti oman ruandan kymmenevuodehine Sel’anočka-pajojoukko, kudai pajatti ven’akse da vähäzen karjalaksegi. Se rodih joukon vedäjän ruavospäi lähtendän periä.
– Karjalan Kielen Koin vuozikerähmös 21. kevätkuudu piätettih elavuttua pajatanduperindö Vieljärvel. Kodi da kluubu pandih väit yhteh da kučuttih kyläläzii naizii paginal. Musteltih Vieljärven horan aigoi, pajatettih pajoloi, vie Iivan L’ovkinan aigaizii. Vuvvel 1938 azuttu hora ei ehtinyh nähtä omii seiččeikymmenvuodehizii. Vuvvel 2005 roittih kluuban muutokset, horan vedäjän palku otettih iäres da suuren pajojuokon elaigu sih katkei, sanoi vieljärveläine Natalja Antonova.
Vieljärven naizet piätettih, ku opitah kerävyö pajatanduharjavuksil kaksi kerdua nedälis. Alletah pajattua horan pajoloi da voinan ven’ankielizii pajoloi. Vedämäh rubieu Karjalan Kielen Koin ruadai Galina Porojeva, kudai opastundua myö on soittai.