”Tal’v om ilokaz voden aig! Tal’vel om hüvä väta irdal, a völ tal’vel om meiden armaz praznik – Uz’ voz’!
— Vanhembad da lapsed lujas varastaba sidä, a mö, Kipinän toimitajad, abutam teile tehta praznikan varastust völ veslembaks, sanub Kipinän vepsläižen nomeran keradai Galina Baburova. – Meiden kulehtesen lehtpolil tö voit löuta čoman mastar’-klassan – voit opetas tehmaha tähthaižid kuzehe.
Kuspäi tuli tradicii söda mandarinoid Uden voden? Mi om ”pomander”? Tö mugažo tedištat meiden kuletesespäi. Vereses nomeras mö tegim ”Armaz sija” da ”Parahim sanaristik”- konkursoiden ühthevedoid. Mugažo tal’vkun nomeraha om pandud uden voden kalendar’”. Lugijoiden pirdatused čomitiba tal’vkun nomeran lehtpolid. Melentartuižed harjoitused, ilosižed runod, kaikenaigaižed rubrikad varastaba Kipinän lugijoid. Verez nomer voib ostta ”Periodika”-paindištos.