Vepsläine karg ozutadihe ”Kul’tura”-kanalan efiras
Vepsläine karg ”Šest’orka troikoiš” mülüb ”Kantele”-ansambl’an programmaha. Se om karg, miččen pani scenale tetab horeograf, tetab vepsläine Vasilii Kononov. Nece-ki karg oli valitud konkursan täht. Neičukaižed vaumičihe konkursaks läz pol’t vot. Ansambl’an ohjandab baletan artist Aleksandra Grišina, a mugoižen čoman matkan om vaumičenu Kantele-pertin radnik Alina Kartinen. Hö oliba-ki ühtes neičukaižidenke Moskvas.
— Meil oli vaumitud televidenijan täht kaks’ kargud. Toine om nece vepsläine karg da toine om karg paikoidenke. Ezmäi meile nevodihe ozutada kargud paikoižidenke, ved’ se om kirjav da čoma. No kaik-se lopuks valitihe vepsläine karg. Se om erine, se ozutab vepsän rahvahan kul’turad, sanui Alina Kartinen.
Sjomkad oliba elokus Mosfil’mas. TV-efiras ”Kantele”-lapsiden ansambl’an ezituz oli sügüzel. Žurijoukus oli ne´l’l’ tetabad professionališt horeografad. Hö andoiba neičukaižile küzundoid kargun elementoiden polhe, andoiba heile hüvid nevondoid da kitiba heid čomas kargus.
— Mö olim televidenijal ezmäižel kerdal. Enamba kaiked varaižiba da oliba holiš kazvatajad da ansambl’an ohjandajad. Lapsed väzuiba, ved’ mö olim Moskvas kogonaižen päivän. No kaik-se hö oliba ihastusiš. Mö vastsim sigä äi tetabid artistoid, tegim heidenke fotoid i saim äi hüvid melid neciš matkas, sanui Alina Kartinen.
