Vepsläine delegacii ühtneb Pohjoižen naižiden forumaha
29. kezakud — 01. heinkud Moskvas mäneb II Pohjoižen naižiden forum. Sihe ühtneb enamba 800 mest: vähäluguižiden rahvahiden naižed-ezitajad Pohjoižen, Sibirin da Edahaižen Päivnouzman 28 agjaspäi. Naižiden keskes oma kundaližiden sebroiden pämehed, socialižed radnikad, opendajad, lekarid, a mugažo Tünän meren, Pohjoižen da Baltijan merilaivišton voinmehiden akad. Forumaha ühtneba vepsläižed naižed Karjalaspäi, Piterin da Vologdan agjoišpäi.
— Plenarižel ištundal eziniba Federacijan Nevondišton pämez’ Valentina Matvijenko, Edahaižen Päivnouzman da Arktikan kehitoitandan ministr Aleksei Čekunkov i toižed. Kaik homaičiba, miše naižen rol’ om znamasine Venäman rahvahiden ühtmuden vahvištoitandas, sanui Vepsän kul’tursebran pämez’ Larisa Čirkova.
Azjtegon programmaha mülüba tematižed sessijad, miččed om omištadud pohjoižiden maiden socialiž-ekonomižen kehitoitandale, rahvahiden tradicijoiden da keliden, tervehtoituztedon, opendusen, turizman kaičendale i toižile aktualižile küzundoile.
— Mäneb mugoine znamasine azjtego. Oli letud äi päivteraližid küzundoid, miččed koskiba kelid, opendust, tervhut. Om hüvä, miše om voimuz pagišta ristituidenke i vajehtadas mahtištol. El’gendad, miše oma üks’meližed i erasid küzundoid pidab diskutiruida ühtes da pätta niid, sanui Čalnan külän administracijan pämez’ Natalja Silakova.
Foruman ühtnikad vaumištaba taričendoid, kut voib tugeta naižid i midä voib tehta, miše pohjoižed agjad kehitoižihe.
Tarkištele "Oma Median" MAX-kanalad!
