Joga voden Pohjoižen igähižiden rahvahiden ezinikoid da aktivistoid pauklahjoitas korktoil arvznamoil sures rados da panendas igähižiden rahvahiden kehitoitandaha. Täl vodel ”Uskondas Pohjoižele”-medalin sai vepsläine aktivine naine Natalja Silakova.
— Nece om varastamatoi azj minun täht, olen ihastusiš. Ved’ igähižiden rahvahiden kaičend nece ei ole vaiše ”Kalarand”-etnoparkan tegemine, pensijan samine vepsläižile i äi tošt, nece täudes om sur’ rad. Nece pauklahj anttas ei vaiše vepsän rahvahan kaičendas, pidab kaita kaik igähižed rahvahad, kudambad eläba Venämal. Pärad om siš, miše oppida zakonoid, tarkištelda niid da tehta taričendoid diskutiruitandan täht Pohjoižen, Sibirin i Edahaižen Pävnouzman igähižiden vähäluguižiden rahvahiden associacijaha, sanub Natalja Silakova.
Medalin ”Uskondas Pohjoižele” sädi Pohjoižen, Sibirin i Edahaižen Pävnouzman igähižiden vähäluguižiden rahvahiden associacii vodel 2009. Jo äi vot se anttas igähižiden rahvahiden ezinikoile, ekspertoile, kudambad kaičeba rahvahiden oiktuzid, aktivistoile, kudambad tegeba Pohjoižen rahvahiden elod paremba, niiden keskes joga voden oma vepsläižed-ki.