Vepsläižed vasttihe openikoiden konferencijal Šoutjärves
Tämbei Šoutjärven škol vastsi adivoid erazvuiččiš tahoišpäi. Openikad Šoutjärvespäi, Kalagespäi, Šokšuspäi, Ladvaspäi da Petroskoišpäi ozutiba ičeze dokladoid “Todesižed vepsläižed”-konferencijal.
Tervehtoiti konferencijan ühtnikoid Šoutjärv’-posadan pämez’ Irina Safonova da Šoutjärven školan pämez Natalia Bikova.
―Om hüvä, miše nece tradicionaline konferencii eläb nügüd’-ki. Mö olem hüviš meliš, miše tämbei konferencijale mugažo tuliba meiden posadan eläjad, Šoutjärven muzejan radnikad, sanub Natalia Bikova.
Lapsed starinoičeba ičeze kodiman istorijan polhe, ristituiš, kudambad kaičeba vepsän kel’t da kul’turad. Žürijoukus oliba tetabad vepsläižed: “Kodima”-lehtesen pätoimitai Irina Sotnikova, Vepsän kul’tursebran pämez’ Larisa Čirkova, Karjalan televidenijan radnik Maria Šašina da Rahvahaližen da regionaližen politikan ministerstvan radnik Ol’ga Sobolenko.
Vägestajiden polhe voib lugeda tulijas “Kodima”-lehtesen nomeras. “Todesižed vepsläižed”-konferencii om üks’ Vepsän rahvahan kul’turan voden azjtegoišpäi.
