Venämal tehtas uz’ matkprojekt, miččen nimi om ”Rahvahuz’.ru”. Projektas tutabad matkblogerad starinoičeba meiden man rahvahiš, niiden kul’turas da tradicijoiš.
Kiži-muzejas ”Rahvahuz’.ru”-projektan aigan mäniba sjomkad, miččed ozutaba Karjalan valdkundad. Nece projekt tundištoitab vepsläižiden tardicijoidenke da elonke, starinoičeb sen rahvahan melentartuižiš azjoiš. Pähengen tegihe vepsläine Anna Anhimova.
— Mö ozutim, miše vepsläižed ei olgoi vaiše meceläjad. Minä kucuin kuvaduzgruppad Kiži-muzejale, sikš ku tägä om ozutadud vepsläine ekspozicii. Minä paštoin adivoile vepsän rahvahališt paštatest: kalitoid, skancoid, jotin čajul, starinoičeb Kiži-muzejan radnik Anna Anhimova.
Edel matkad Kiži-muzejale, kuvaduzgrupp oleskeli vepsläižes Šoutjärv’-küläs, kus pagiži külän eläjidenke.
Serijan Karjalan polhe vedäi om Aleksandr Snitovskii. Šoun täht planuitas kuvata erasid sadoid videod. Eloho tuliba jo serijad kabardincoiden, tataroiden, čuvašijoiden da toižiden rahvahiden polhe.