Vepsänkeline kirjklub varastab kaikid tahtnikoid
”Vepsän vezad”-vepsläižen norišton sebran aktivistad pätiba tehta kirjkluban. Ezmäine vastuz ozuti, miše mugoine klub om tarbhaine, se tuli mel’he norile. Vastusel pagištas vepsän kelel lugetud kirjan vai kirjutesen polhe. Kirj valitas aigalaze. Täl kerdal paginikad lugiba vepsläižen sarnan ”Kükstud koir da kaži”. Pagištihe sarnan süžetan polhe, sen pähengiden polhe da kelen erigoičusiš.
—Nece oli meiden ühtnikan Maria Kočerinan idei. Hän tariči keratas da pagišta literaturan polhe: erazvuiččiš starinoiš, romanoiš da sarnoiš. Mö meletim, miše nece om hüvä idei, ved’ mö voim enamba pagišta vepsän kelel. Mö tahtoižim, miše nece klub oliži tradicijan, sanui ”Vepsän vezad”-sebran pämez’ Tatjana Martjanova.
Vepsläine kirjklub planuitas tehta ühten kerdan kahtes nedališ. ”Vepsän vezad”-sebr kucub ičeze klubaha kaikid, ken tahtoib lugeda enamba da pagišta toižidenke lugetud tekstoiš da ken tahtoib pagišta vepsän kelel enamba.
