Vepsän rahvahan hor sai arvnimen
Venäman kul’turan mininsterstv andoi Vepsän rahvahan horale ”Rahvahan sädandradon arvostadud kollektiv”-nimen.
Kaiked mugoižid arvnimid täl vodel sai 46 kollektivad Venämal. Nene oma sädandsebrad, miččed tegiba suren panendan meiden man kul’turelon kehitoitandaha.
— Em meletagoi pauklahjoiš i arvnimiš. Mö äjan radam i meile om mel’he se, midä mö tegem. Harjenim panda ičemoi radho kaik vägid. Minei om mel’he, miše horan ühtnikad uskoba minei, erased pajataba horas enamba 30 vot. Hö iče jo oma tehnus tedomahtajikš artistoikš neniš voziš, sanub Vepsän rahvahan horan ohjandai L’udmila Melentjeva.
Vepsän rahvahan horan sädi Šoutjärves tetab horeograf Vasilii Kononov vodel 1936. Nügüdläine horan ohjandai L’udmila Melentjeva radab siš jo enamb 40 vot. Horan repertuaras om vepsläižid tradicionaližid da tradicionaližel pajatandladul sädud nügüdläižid pajoid.
