“Vepsän man än’”: üks’ projekt – äi azjtegoid
“Vepsän man än’”, uz’ “Vepsän kul’tursebran” projekt, vodel 2026 vägesti Karjalan Pämehen grantoiden fondan konkursas. Necen projektan pätegend om popul’arizoitta da levitada tedoid vepsän rahvahan kul’turjäl’gestuses.
Projektan aigan planuitas tehta äi azjtegoid. Niiden keskes oma “Pened Pimenovan lugendad” -lapsiden konferencii Šokšus, “Loninan lugendad” -regionoidenkeskeine konferencii Šoutjärves, “Vepsän rahvahan tradicijan mödhe” -pajofestival’ Kvarcitnii-küläs.
— Mugažo mö tegem kirjutesiden konkursan, miččen tem om “Kut minä tegimoi vepsläižeks”. Igähižiden vähäluguižiden rahvahiden päiväks kirjutesiden pohjal planuitas tehta “Minä olen vepsläine” -teatrozutuz, i se ozutadas kaks’ kerdad: Kalages da Petroskoiš, sanui “Oma Media” -portalale Larisa Čirkova, “Vepsän kul’tursebran” pämez’ da projektan tegii.
Sen ližaks projektan aigan paindas “Endevanhad starinad” (Venäman igähižiden rahvahiden starinoiden pohjal) vepsän da venän kelil, vedetas tradicionaližen vepsän paštatesen, vändoiden ta teatrtaidehen mastar’-klassad Änižröunan vepsläižiden školiden openikoile, vepsläižiden eländtahoiden eläjile da adivoile.
Projektan abul voib enamba popul’arizoitta vepsän kel’t: sen aigan vedetas kel’kursad Kalages, Šoutjärves da Kvarcitnii-küläs, a mugažo ližatas online-kändajaha uded sanad i sanundad.
Projekt todenzoittas voden 2026 heinkuspäi voden 2027 heinkuhusai.
Tarkištele "Oma Median" MAX-kanalad!
