“Vepsän kul’tursebr” om vaumiž tehta ühthevedod 35 vodes
Sügüz’kun lopus Šoutjärves mäni “Loninan lugendad” -konferencii, mitte oli omištadud Vepsän kul’tursebran 35-voččele jubilejale.
— Konferencijan aigan mö andoim kitändkirjeižid Sebran ühtnikoile, Änižröunan školiden pämehile da vepsän kelen opendajile, Šoutjärven muzejan radnikoile da Vepsän rahvahan horan pajanikoile. Nene oma ristitud, kudambad kaiken aigan tuleskeleba abuhu, tehleba ühthižradod Sebranke, sanui “Vepsän kul’tursebran” pämez’ Larisa Čirkova.
Larisa Čirkova mugažo ližadab, miše necen voden Sebran päsatusen om “Sanu! Luge! Kirjuta!” -openduzkirj, miččen vaumištiba Kalagen školan opendajad Maria da Ol’ga Mironovad. Nece kirj om hüvä abunik vepsän kelen kursiden opendajile da openikoile. Mugoižed kursad nügüd’ vedetas Petroskoiš da koumes Änižröunan küläs: Šokšus, Šoutjärves da Kalages.
— Mö kazvatim noriden aktivistoiden uden sugupol’ven. Meletan, miše nece om lujas tärged. Hö tuliba meile abuhu i, toivon, jatktaba meiden radod edemba. Mugažo vahvištoitim sidoid toižiden vahäluguižiden rahvahidenke. Nügüdläižiden tehnologijoiden abul tehta necidä om völ kebnemb, sanui “Vepsän kul’tursebran” varapämez’ Zinaida Strogalščikova.
— Neniš voziš mö oppim ičemoi oiktusid da voibištelemoiš niiš, mugažo ližazi hän.
Tal’vkun lopus “Vepsän kul’tursebran” ühtnikad keradasoiš praznikaližel ehtal, miše tehta ühthevedod 35 vodes da märita radplanoid tulijaks aigaks.
