Necikš vodeks Vepsän kul’tursebral oli planuitud ebnamba 12 sur’t azjtegod. Niiden keskes oma ”Kalarand”-etnoparkan radon jatkund da Openduzsessii opendajiden da kul’turkeskusiden radnikoiden täht. Kaik nene azjtegod mülüba ”Kel’t ei jüged kandišta”-projektaha, mitte vägesti muloi Karjalan pämehen grantan konkursas. Niid tugedab Karjalan rahvahaližen da regionaližen politikan ministerstv.
— Meil om völ kaks mugošt sur’t azjtegod, miččed mäneba necil sügüzel. 22. sügüz’kud Šoutjärves tehtas Loninan lugendad. A 29. redukud neciš-žo küläs mäneb Pajokeraine-festival’, miččele jo oigendaba ičeze pakičusid ühtnikad, sanub Ministerstvan Igähižiden rahvahiden tugen erišton radnik Jevgenia Šustova.
Ištundal Sebran ühtnikad valičiba ut pämest. Häneks tegihe udes Karjalan radion toimitai Larisa Čirkova. Mugažo valitihe varapämehid da udištadihe sebran ühtnikoiden lugetišt. Edel teraviden küzundoiden pätandad lahjoitihe ”Za vernost’ Severu”-medal’ Petroskoin Suomalaiž-ugrilaižen školan vepsän kelen opendajale da äjiden vepsän kelen openduzkirjoiden tegijale Nadežda Petrovale.