Vepsän kul’turan kaičijad om pauklahjoitud “Za vernost’ Severu” -medalil
Piterin agjan tetabad vepsän rahvahan kul’turan kaičijad P’otr Vasiljev da Alevtina Vasiljeva saiba “Za vernost’ Severu” -medalid, miččed andab Venäman Pohjoižen, Sibirin da Edahaižen Päivnouzman igähižiden vähäluguižiden rahvahiden associacii. Siš tedotab “Vepsän kund” -sebr ičeze VKontakte-lehtpolel. “Vepsän kund” -sebr om associacijan Koordinacijaližen nevondišton ühtnik, miččel om oiktuz’ tarita pauklahjoičendan täht kandidatoid vepsän rahvahaspäi.
— Olen sädai mez’, minun elon pätegend om rata kodiröunan da vepsän rahvahan hüvüdeks. Nece medal’ om suren arvostusen znam — olen lujas ozakaz! Nece andab minei väged jatkta ičtain radod, sanui “Oma Media” -portalale P’otr Vasiljev.
P’otr Vasiljev om kirjutai, runoilii, žurnalist, kodi-istorijan tundii, Venäman Kirjutajiden ühtištusen ühtnik, vepsän rahvahan istorijan oppii. Hänen kirjoiden, kirjutesiden, teleprogrammoiden da ekskursijoiden abul äi mehid tundištase vepsän man bohatanke kul’turjäl’gestusenke. Hänen äivozne rad kaičeb istorijališt muštod, popul’arizoitab vepsän rahvahan kul’turad da kel’t, opendab arvostamha kodiröunad da sen eläjid.
Jo äi vozid P’otr Vasiljev oigendab ičeze kirjutesid “Kodima”-lehtesen toimištoho — nece om satusekaz da čoma ühthižtö.
P’otran ližaks medalin sai Alevtina Vasiljeva, kudamb om tetab veroiden kaičii, tradicionaližen poimetišen mastar’, vepsän kelen da kul’turan tundii. Nenid arvokahid tedoid Alevtina andab norile sugupol’vile.
Pauklahjoičend mäni “Pert’ Vepsläižel tehudel” -art-sijan avaidusen ceremonijal. P’otr da Alevtina saiba lämid ozatelendsanoid “Vepsän kund” -sebran pämehelpäi Vladimir Jetojevalpäi da sebran ühtnikalpäi i vepsläižel aktivistalpäi Ol’ga N’umanalpäi.
“Za vernost’ Severu” -medal’ om korged pauklahj, miččen voib sada ristit, kudamb tegeb sur’t panendad Pohjoižen rahvahiden kul’turan, tradicijoiden da radonmahtoiden kaičendaha i kehitoitandaha, a mugažo varjoičeb neniden rahvahiden oiktusid.
Tarkištele "Oma Median" MAX-kanalad!
