“Vepsän kond” -sebr tegihe tetaban premijan laureataks
Vägestusen sebrale toi “Vepsän kond: eläb kel’” -projekt. “Vepsän kond” oli tehtud kuti etnografine muzejališt-openduseline kompleks vanhas pupertiš vodel 2020 Piterin agjan Järved-küläs. Aigan sirttes läz sidä seižutadihe časoun’, čibud, vezimel’nic, pandihe völ üks’ tradicionaline vepsläine pert’.
— Vägestuz konkursal om meiden projektoiden suren joukun satuz. Ülendamoiš kaikuččel, ken ühtni projektoiden tegemižehe — ken opendab vepsän kel’he, ken ombleb, ken paštab, ken abutab erazvuiččiš azjoiš. Nece om meiden ühthine vägestuz, sanui sebran varapämez’ Ol’ga N’uman.
Nügüd’ “Vepsän kond” tegihe Piterin agjas sijaks, kuna tulesekeleba kaik, kelle om melentartušt vepsläine kul’tur. Sigä tehtas vepsläižiden tradicionaližen sädon, paštatesiden mastar’-klassad, mäneba vepsän kelen kursad. Mugažo projektoiden abul oli paindud kirj vepsän rahvahan mifologijas.
