Vepsän kelen opendai tegihe premijan laureataks
Vepsän kelen opendai Anastasia Jevtušenko Šoutjärven školaspäi sai ”Rahvahan ülenduz-2024” -Ühthižvenälaižen kundaližen premijan. Jo videnden kerdan Moskvas mäni Ühthižvenälaižen kundaližen premijan laureatoiden pauklahjoičendan praznikaline ceremonii. Nece premii anttas ristituile, kudambad tegeba suren panendan etnokul’turižehe kehitoitandaha da Venäman rahvahiden ühtmuden vahvištoitusehe.
— Minä tozi-ki ülendamoi, miše olen tägä i ezitan ičein rahvast, vepsän kel’t da meiden Karjalan valdkundad. Te, miččen minä valičin, ei ole kebn, no minä mänen sidä tedme, mittušt nägen ičein edes, sanui Anastasia Karjalan Opendusen da sportan ministerstvan press-službale festivalin aigan.
Täl vodel oli pauklahjoitud Venäman 17 regionan ezitajad. Anastasia Jevtušenko on ”Karjalan voden opendai 2024” -konkursan vägestai ”Kodikelen opendai” -nominacijas. Hän mugažo om ”Parahim kodikelen da literaturan opendai-2024” - Ühthižvenälaižen konkursan laureat. Nece konkurs mäni 15.—22. sügüz’kud Kazaniš.
