Vepsän kelen opendai Karjalaspäi om parahim Venämal
Lipeckas tehtihe V Kaikenvenäman “Kodikelen da literaturan parahim opendai” -konkursan ühthevedoid. Konkursaha ühtniba kodikeliden opendajad da kazvatajad Venäman erazvuiččiš agjoišpäi, oli ezitadud Venäman rahvahiden 38 kel’t. Opendajiden keskes vägestajaks tegihe Šokšun školan vepsän kelen opendai Gleb Fomin.
— Vides vodes konkurs tegihe popul’arižeks, joga voden ühtnikoiden lugu kazvab. Ezmäižel vodel ühtni 69 mest 68 agjoaspäi. Necil vodel konkursal oli 131 opendai 87 meiden man agjaspäi. Vides vodes konkursal oli ezitadud 47 rahvahaiden kel’t, sanui Venäman tedoiden levinzoitamižen ministr Sergei Kravcov.
Konkursan mäni Venäman rahvahiden ühtmuden vodel da Päivkodin opendusen vodel. Vides päiväs konkursan ühtnikoile pidi ozutada ičeze opendusen metodikoid, vedäda urokoid, mastar’-klassoid, a mugažo ezmäižen kerdan hö ühtniba “Tedoiden levinzoitamižen radmahtoho”. Gleb Fomin päzui kaikiš konkursan kodvusišpäi, ozuti armastust vepsän kel’he da nügüdläižid vepsän kelen opendusen metodikoid.
— Spasib kaikile kollegoile, kaikile, ken tugezi mindai, zavodim rata edemba, miše sada uzid satusid vepsän kelen opendamižes, kaita da kehitoitta kodikel’t, sanui Gleb Fomin.
Tarkištele "Oma Median" MAX-kanalad!
