Vepsän kelen nedal’ lopihe kuvadamižel tohespäi
Vepsän kelen nedalin aigan Petroskoin Suomalaiž-ugrilaižes školas mäni äi erazvuiččid azjtegoid, miččed oli omištadud vepsän rahvahan kul’turale. Tämbei akcii lopihe mastar’-klassal, miččel openikad openzihe kuvadamha tohespäi.
— Minä ozutin lapsile, kut voib kuvata tohespäi nabornikan. Nece ei ole jüged. Pidab vaiše el’geta tehnikad. Olen ihastusiš, miše voin sirtta ičein tedoid toižile. Meletan, ku hot’ üks’ ristit opendase miččehe-ni vepsläižehe käzitöho, ka minun rad ei ole tühj, sanub pusep, Petroskoin universitetan Tehnologijan, taidehen da dizainan kafedran üläopenik Denis Laidinen.
Denis om sündunu Šokšus, laps’aigaspäi hän mahtab kuvata tohespäi, tehta puspäi radkaluid, muzikaližid vändimid, bobaižid.
Vepsän kelen nedalin lopus mugažo lapsile taritihe pirtta bumagal associacijad “vepsläine” -sananke.
