Valentina Mironova on suannuh medalin Kanzallizen poliitiekan ministran Sergei Kisel’ovan käzis. Valentina Mironova on Karjalan tiedokeskuksen Kielen, literatuuran da histourien instituutan rahvahanrunohuon tutkii. Läs kolmenkymmenen ruadovuvven aigua Valentina Mironova on kerännyh rahvahan runohuon ainehistuo, piästi ilmah äijän kniigua da tiedokirjutustu, puolisti anuksenkarjalazien runoperindöh nähte kirjutetun väitösruavon. Oman piäruavon ližäkse häi mielihyväl levittäy tiedoloi karjalazis da karjalazes runohuos lehtien, žurnualoin, tv:n da raadivon kauti.
– Olen hyväs mieles, ku minun ruado on muga korgiesti arvostettu da minä sain tämän kunnivomerkin. Ga tämä palkičus ei ole vaiku minun, se on kaikkien karjalazien palkičus, se tovestau, ku oman rahvahan kielen da kul’tuuran tiedämizen da tutkimizen hyvyös voibi piästä korgieloih tuloksih, sanou Valentina Mironova.
Valentina Mironova jatkau omua tutkimus- da yhteskunnallistu ruaduo. Iel on uuttu projektua da ruadomatkua.