Völ nel’l’ last tuli Petroskoin školha opendamha vepsän kel’t

Nel’l’ openikad – kaks’ prihašt da kaks’ neičukašt – opendaškandeb vepsän kel’t ezmäižes klassas. Kuva: Galina Baburova

Kaiked vepsän kel’t Petroskoin Suomalaiž-ugrilaižes školas opendab 19 last. Nügüd’ openikad vepsläižiš gruppoiš oma vaiše 1.–8. klassahasai. Nel’l’ openikad – kaks’ prihašt da kaks’ neičukašt – opendaškandeb vepsän kel’t ezmäižes klassas.

— Meil oma venälaižed jured, no minun mam pit’kha eli Šokšus. Hän äjan kuli vepsän paginad. Minei-ki om mel’he nece kel’. Täl vodel minun poig mäni ezmäižehe klassaha i zavodib opeta vepsän kel’t, sanub Varvara Avdaškova.

— Minun mužikan vepsläižed jured oma Kaskezaspäi, minun – Vologdan agjaspäi. Vepsän kel’ da kul’tur oma tutabad meile, sikš ičemoi Tarja-tütren oigenzim opendamha školas vepsän kel’t, ližadab Natalja Krilova.

Tedoiden päivän školan pordhidenno mäni praznik. Sen jäl’ghe ezmäižiden klassoiden openikoil oliba klassančasud, a heiden kazvatajiden täht oli tehtud tundištoituzmatk školadme. Vanhembad vändiba ”Kyykkä”-vändoho, ladiba kuvata kokl’uškoil da kargaižiba karjalašt ”kruugad” ”Lastenpiiri”-sebran ohjandajanke.