Uz’ portal starinoičeb Arktikan igähižiden rahvahiden elos

Uz’ portal andab voimusen tundištadas Arktikan igähižiden rahvahidenke, heiden kul’turanke da kelidenke. Kuva: portalan skrinšot 6+

Zavodi rata uz’ portal ”Arktikan lapsed”. Sen avaiduz oli Moskvas, kuna kerazihe Arktikan igähižiden rahvahiden ezitajad. Vepsän rahvast eziti Šokšun školan 10. klassan openik Sergei Čusov. Hän openzi televedäjad Boris Gorbunovad sanuda tervhen- da prostindsanoid vepsäks, a mugažo starinoiči ičeze penes kodimas.

—   Minei om lujas mel’he, miše sündui uz internetsija, kuna keratas tedoid vepsän rahvahan polhe. Sigä voib löuta melentartuižid videorolikoid, ozutesiks, kut ende vepsläižed eliba, midä radoiba, kut kaveliba mecha, saiba kalad. Neniden videourokoiden abul voib opeta miččid-ni sanoid, sada uzid tedoid. Nügüdläižed lapsed kaik oma Internetas i hüvä om, miše tehtas nügüd’aigaližid azjoid, miččed oma melentartuižed ezmäi kaiked lapsile. Meiden vepsän kelen opendajad voiba otta radho necen-ki resursan da tehta vepsän kelen urokoid melentartuižemba, sanub Vepsän kul’tursebran pämez’ Larisa Čirkova.

Portalas voib löuta kel’kursid, videoekskursijoid, voib tundištadas Arktikan igähižiden rahvahiden kul’turanke, elonke da kelidenke. Se linneb melentartušt lapsile i aigvoččile.