Šoutjärven külän eläi Viktor Lonin om tehnu kirjan, miččes starinoitas partizanoiden peitjoukus, mitte radoi Šoutjärves Suren voinan aigan. Hän tegeb kirjan ičeze ecindmatkoiden da kaivandoiden pohjal. Kirjan prezentacijale kerazihe Šoutjärven eläjäd da adivod, miše tedištada kirjan polhe enamba sen tegijan suspäi.
—Meletan, miše kirjaspäi ristitud saba tedoid, miččed urohod, rohktad ristitud oliba meiden mal, midä hö tegiba meiden hüvän elon täht. Nügüd’ meiden ecindjouk radab i löudab soldatoiden luid, azegid, pul’kad. Kaik nece abutab kerata materialoid, sanub kirjan tegii da ecindjoukun ohjandai Viktor Lonin.
Viktor Lonin äjan radab arhivas, miše löuta uzid tedoid, ajeleb ecindmatkoihe ičeze joukunke. Hänen planoiš oma toižed-ki matkad. Vepsän mal om völ äi sijoid, miččed kaičeba istorijad da voiba starinoita voinan polhe.