Uuzi suarnukogomus nägi päivänvalon
On piässyh ilmah Bublikov sv’azka -kniigu. Bublikov svazka -suarnukogomukseh on pandu mennyöl vuozisual mustoh panduu kaksitostu tekstua. Niidy saneltih tutkijoile rahvahanrunohuon maltajat Karjalan pomourien kylispäi, myös Oniegutagazen da Puudogan alovehien eläjät. Suurin vuitti nämii suarnoi on painettu ezmästy kerdua.
— Myö tavan mugah kaikin olemmo sidä mieldy, ku suarnoi keksittih lapsih niškoi. Vaiku ei se ole muga. Ennevahnas parahinnu suarnoin tiedäjinny oldih ruavahat miehet da hyö saneltih suarnoi meččyruavos da kalas olles, mečästäjes da spluaval. Jygien ruavon jälles hyö kerävyttih yhteh da ozutettih toine toizele omua kerdomusneruo. Myöhembäh suarnoi ruvettih sanelemah naizetgi, vikse heispäi rubei leviemäh taba sanella zuakkunoi lapsile, sanou rahvahanrunohuon tutkii Valentina Mironova.
Kogomuksen luadii on säilyttänyh sanelijoin paginluaduu, sendäh lugijes myö voimmo nähtä, miittumal čomal kielel paistih ennevahnas eri kylis.
Kniigal on erinomaine nimi ”Bublikov sv’azka” (kar. ”Kringelisivotes”). Suarnat kniigas ollah buiteku sivottu yhteh da ozutetah Karjalan ven’alazien omaluadustu suarnuperindyö.
Tämä suarnukogomus oli valmistettu Kvartal -avtonoumizes yhteiskunnallizen järjestön Veter nasledija Severa -projektan hantuzis, kuduadu kannatti Karjalan piämiehen fondu. Kniigu oli painettu Periodika-julguamos. Kniigua čomendetah lapsien piirustetut kuvat. Kniigu on suadavu lugiettavakse Karjalan kirjastolois.
