Šuomelais-ugrilaisien kanšojen forumi: tulokšet
Joškar-Olašša loppu III Koko Venäjän šuomelais-ugrilaisien kanšojen forumi. Forumin loppupäivänä ruato šen kolmešša ošašša jatku ta iltapuolella oli luajittu ruavon tulokšie. Joka ošašša oli kuunneltu kymmenie šeloššušta eri teemoista: projektitoiminta, nuorisojärještöjen toiminta. Kurattorit šuatih ošallistujilta ehotukšie ta šanottih ne lopputilaisuošša.
— Pitäy jatkua Šuomelais-ugrilaisien nuorisojärještöjen johtajien koulun pitämistä. <...> Auttua šäilyttyä vähälukusien kanšojen ta kanšaryhmien kulttuurija ta kielie. Kannattua šuomelais-ugrilaisien kanšojen jokavuotisen kirjallisušlehen julkaisuo, nykyaikasien laulujen šuomelais-ugrilaisilla kielillä nauhotušta ta pityä festivali “Nuori hanurinšoittaja”, šano Kanšallini johtajakoulu: idejašta toteuttamiseh -ošan moderattori Maksim Algaikin.
— Meijän ošašša oli kaikešta enemmän ošallistujie. Myö kuuntelima yli 40 esityštä. Piättimä, jotta pitäy luatie online-šivu, kumpani auttau čukeltua šuomelais-ugrilaiseh kulttuurih. <...> Kannattua kiäntäjien toimintua ta avata alovehissa šekä tašavalloissa viralliset šuomelais-ugrilaisien kielien kiännöškeškukšet, šano Perintehelliset henkelliset arvot Venäjän yhtehisen koodin šäilyttämisen faktorina -ošan moderattori Aleksandr Korepanov.
— Joka esitykšeššä oli šanottu oikein arvokkahie tietoja. Olemma varmoja, jotta pitäy valmistua ammattilaisie ta kehittyä ruatajien ammatillisutta, kerätä etnovalokuvien ta videojen yhtehini korpussi, jotta opaštua tekoälyö luatie oikeita kuvie. Pitäy uuvveštah alottua šuomelais-ugrilaisien lehtimiehien ta toimittajien liiton toimintua, šano Nykyni mediatila: taistelu älyštä ta yhtevyöštä -ošan moderattori Aleksandr Daniljevič.
Ošien ruavon tulokšien mukah oli valmissettu piätöš. Šen esitti Venäjän Šuomelais-ugrilaisien liiton presidiumin jäšen Anna Anhimova. Hiän oli kaikissa Venäjän šuomelais-ugrilaisien kanšojen forumissa ta korošti, jotta šeloššukšien tašo huomattavašti nousi ta on hyvä, jotta on uušie ruavon muotoja šekä ilottau, kun ošallistumah tulou uušie ihmisie.
Piätöš valmissetah julkaisukši ta hyväkšytäh lähisenä aikana.
Šen jälkeh oli juhlallisešti annettu Kanšallisukšien aseijen federalisen toimiston kiitollisie kirjoja. Karjalan tašavallašta forumin ošallistuja, Venäjän Šuomelais-ugrilaisien liiton nuorisoneuvošton jäšen Timofei Migunov oli palkitettavien joukošša. Hiän šai kiitollisen kirjan panokšešta kanšojen välisen rauhan ta šovun lujentamiseh.
