Šuomelais-ugrilaini nuoriso šuau kannatušta
Karjalan piämiehen granttien fondi kannatti FUMM — šuomelais-ugrilaiset nuorisomatat -projektin toteuttamista. Kaikki tapahtumat šuunnitellah pityä enši vuotena.
Nuorison roolin kannatuš šuomelais-ugrilaisien kanšojen kulttuurin ta kielien šäilyttämiseššä on FUMM ‒ šuomelais-ugrilaiset nuorisomatat -projektin tehtävä. Šitä rupieu toteuttamah Šuomelais-ugrilaisien kanšojen liitto -kanšalaisjärještö. Projektin rajoissa šuomelais-ugrilaisien nuorisojärještöjen etuštajat tullah Karjalah ošallistumah konferenšših, kešäkouluh ta Karjalaisien kerähmöh šekä Karjalan tašavallan delegatijo lähtöy Kalitta-festivalih Mämminö-kyläh Tverin alovehella.
— Enši vuuvven oraškuun lopušša myö keräyvymmä enšimmäistä kertua Nuorisokonferenšših. 50—60 nuorta ihmistä pakajau eri teemoista konferenššin ošaštoissa. Kešällä Kiži-šuarella myö vietämmä Kanšan kouluo aktivistie varoin. Šielä jokahini opaštuu kehittämäh omie idejoja karjalaisien ta vepšäläisien kielen ta kulttuurin šäilyttämisekši. Koulun ruavon tulokšena valmissamma elektronisen karttakirjan, kumpasešša on kehityšajatukšien luvettelo, šelitti Itämeren-šuomelaisien kanšojen liiton johtaja Anna Anhimova.
Ajatuš kannattua nuorisuo ta auttua heitä omien idejojen kehittämiseššä oli jo ammuin. Anna Anhimova esitti tulijan projektin idejan Šuomelais-ugrilaisien kanšojen forumissa Saranskissa ta šielä šai šamamielisien kannatušta projektin kirjuttamisekši. Anna tahtou, jotta projekti šais jatkuo toisissa šuomelais-ugrilaisissa tašavalloissa.
