Universitetan üläopenikoile tehtihe tundištoituz “Periodika”-painištonke
Tämbei Petroskoin universitetan baltianmeren suomalaižen filologijan kafedran üläopenikad tuliba tundištamhas “Periodika”-painištonke.
— Mö kaikuččen voden tundištoitam ezmäižen voz’kursan üläopenikad “Periodika”-painištonke. Ozutam heile, kus nügüd’ lujas levedas kävutoittas Karjalan rahvahaližid kelid, kus hö voiba rata opendusen jäl’ghe, sanub universitetan karjalan kelen livvin paginan opendai Anastasia Kongojeva.
“Periodikan” pämez’ Natalja Sinickaja starinoiči painišton rados, toimištoiš da kirjoiš, miččed tägä pästtas eloho. Tundištoituzmatkan jäl’ghe “Oma mua”-lehtesen radnik Margarita Kemppainen starinoiči endevanhas karjalaižes sädos da tarjoiči tahtnikoile panda se päle.
Täl vodel Petroskoin universitetan baltianmeren suomalaižen filologijan kafedrale ezmäižele voz’kursale opendamha karjalan, vepsän da suomen kel’t tuli 18 mest. Openduz heil zavodihe vaiše männudel nedalil. Nügüd’ ezmäižen voz’kursan üläopenikad tundištoittas universitetanke da organizacijoidenke, miččed oma universitetanke kinktoiš kosketusiš.
