Uded kirjad: Nügüd’ ”Penikaine princ” om vepsän-ki kelel
Tetab francialaižen kirjutajan Antuan de Sent-Ekzüperin sarn ”Penikaine princ” om kätud jo äjihe kelihe. Ei amu se läksi eloho vepsän-ki kelel. Kirjan kändmižen om tehnu nor’ kel’tedomez’ Maksim Kuznecov, sen toimitai om tetab vepsläine kel’tedomez’ Nina Zaiceva.
— Minei kaiken tahtoiše tehta midä-ni Venäman rahvahiden keliden hüvüdeks. Kandatada da kehitoitta vepsän-ki kel’t om olnu minun täht mugažo tärged azj. Kerdan pähä tuli meletuz: miččen-žo kirjan minä voižin käta vepsän kel’he, miše sidä lugižiba, miše se oliži melentartuine ristituile, sanub Maksim Kuznecov.
— 2021. vodel lopin universitetan da sen voden sügüz’kus lopuks kändin ”Penikaižen princan” vepsän kel’he. Sen tekst om lujas kebn, no minä olin čududelnus sihe, mitte süvä sen-žo aigan se om. Erasid sijoid eskai olin kändmas kündlid sil’miš, ved’ minai-ki konz-se oli ičein rusked roza, sanub Maksim.
Kirj paindihe Germanias, Nekkarštainah-lidnas, mitte pästab «Penikaižen princan» erazvuiččil kelil, siš lugus Venäman kelil.
Kirjan prezentacii tahtoitas tehta Petroskoiš necil sügüzel.
Uzištoid neciš temas voib lugeda mugažo venäks.
